AVISOS

O teu número de colexiación acredítate como profesional diante da sociedade: é o mellor aval para garantir que cumpres coa titulación e cos requisitos legais para exercercomo psicólogo ou psicóloga, sexa cal sexa a túa especialidade ou área de traballo. Faino público nos informes que elabores, no teu espazo de traballo, nas túas comunicacións ...

O Colexio Oficial de Psicoloxía de Galicia ten desde o pasado mes de setembro un novo enderezo de correo electrónico copgalicia@copgalicia.gal. Así integrámonos como dominio .gal, co fin de contribuír a crear unha entidade comunitaria tamén na rede. Lembra que realizamos a meirande parte das nosas comunicacións a través do correo electrónico, así que para garantir que non rematen na carpeta de SPAM, engade o noso enderezo aos teus contactos.

No conxunto do Estado español, é un requisito indispensable para o exercicio da profesión da psicoloxía estar incorporado ao Colexio Profesional correspondente. Todos os psicólogos e psicólogas que exerzan no ámbito público ou privado e baixo calquera fórmula de contratación, teñen esta obriga.

Este requisito recóllese no artigo 3.2  da Lei de Colexios Profesionais despois da reforma operada pola Lei 25/2009 (Lei Ómnibus), que mantén as obrigas vixentes.

Obradoiro para profesionais da psicoloxía habilitados para a realización de probas de avaliación psicolóxica a mergulladores profesionais

A Sección de Psicoloxía do Traballo e das Organizacións do Colexio Oficial de Psicoloxía de Galicia organizou o Obradoiro para profesionais da psicoloxía habilitados para a realización de probas de avaliación psicolóxica a mergulladores profesionais, que tivo lugar no salón de actos do COPG en Santiago de Compostela, o día 11 de novembro de 2016.

Os obxectivos deste obradoiro foron: abordar a avaliación psicotécnica tendo en conta os principios éticos e as directrices de control de calidade e a súa aplicación nos procesos de avaliación psicolóxica de mergulladores profesionais, realizar un estudo sobre as técnicas e protocolos en avaliación psicolóxica a mergulladores en base á información de avaliación de psicólogos/as acreditados/as no ano 2000, establecer metodoloxía e protocolos nos procesos de avaliación psicolóxica a mergulladores profesionais e aproveitar a experiencia profesional facilitada por psicólogos acreditados e sacar conclusións.

O obradoiro foi impartido por:

Mª Emilia Alonso Pérez, psicóloga colexiada e profesional da área dos recursos humanos, con amplía experiencia na selección de persoal e consultoría. Directora de proxectos de selección en EGA Consultores. 

Mª Concepción Prado Álvarez. Psicóloga con actividade profesional en selección de persoal, formación e orientación profesional. Vogal da Sección de Psicoloxía do Traballo e das Organizacións do Colexio Oficial de Psicoloxía de Galicia (COPG). Responsable de emprego e do fondo bibliográfico e psicométrico do COPG. Psicóloga colexiada inscrita no rexistro de psicólogos/as especialistas na avaliación de mergulladores profesionais co nº 18. 

Olegaria Mosquera Bueno. Psicóloga colexiada inscrita no rexistro de psicólogos/as especialistas na avaliación de mergulladores co nº 15. Membro do Grupo de Intervención Psicolóxica en Catástrofes e Emerxencias (GIPCE). Orientadora no IES Santa Irene de Vigo. Impartiu diversos cursos de avaliación e elaboración de informes.

Relatoras do obradoiro
Momento do obradoiro
Momento do obradoiro
Momento do obradoiro