AVISOS

O teu número de colexiación acredítate como profesional diante da sociedade: é o mellor aval para garantir que cumpres coa titulación e cos requisitos legais para exercercomo psicólogo ou psicóloga, sexa cal sexa a túa especialidade ou área de traballo. Faino público nos informes que elabores, no teu espazo de traballo, nas túas comunicacións ...

O Colexio Oficial de Psicoloxía de Galicia ten desde o pasado mes de setembro un novo enderezo de correo electrónico copgalicia@copgalicia.gal. Así integrámonos como dominio .gal, co fin de contribuír a crear unha entidade comunitaria tamén na rede. Lembra que realizamos a meirande parte das nosas comunicacións a través do correo electrónico, así que para garantir que non rematen na carpeta de SPAM, engade o noso enderezo aos teus contactos.

No conxunto do Estado español, é un requisito indispensable para o exercicio da profesión da psicoloxía estar incorporado ao Colexio Profesional correspondente. Todos os psicólogos e psicólogas que exerzan no ámbito público ou privado e baixo calquera fórmula de contratación, teñen esta obriga.

Este requisito recóllese no artigo 3.2  da Lei de Colexios Profesionais despois da reforma operada pola Lei 25/2009 (Lei Ómnibus), que mantén as obrigas vixentes.

Achegas da Psicoloxía

Achegas da Psicoloxía 2016

O 14 de outubro de 2016 celebrouse no Parador de Ribadeo a oitava edición do Achegas da Psicoloxía, no marco do cal fixemos a entrega do Premio Dolores Llópiz, Psicoloxía e Sociedade. Este ano recaeu na Rede Galega de Loita contra a Pobreza, os cales con grade amabilidade compartiron esta xornada con nós.

Tamén recolleron o seu recoñecemento vairas compañeiras que cumpriron os 25 anos de colexiación ininterrompida.

Galeria de fotos [accede á páxina]

Achegas da Psicoloxía 2015

O 30 de maio de 2015 celebrouse no Hostal dos Reis Católicos a sétima edición do Achegas da Psicoloxía, no marco do cal fixemos a entrega do Premio Dolores Llópiz, Psicoloxía e Sociedade. Este ano recaeu no divulgador científico, avogado e economista Eduard Punset, que recolleu persoalmente o galardón e con grade amabilidade compartiu esta xornada con nós prodigándose en conversas e dedicatorias de libros aos colexiados e colexiadas asistentes.

Tamén recolleron o seu recoñecemento vairas compañeiras que cumpriron os 25 anos de colexiación ininterrompida e gozamos da talentosa Najla Shami, que se ocupou do acompañamento musical no acto do Achegas.

Galería de fotos [accede á páxina]

Achegas da Psicoloxía 2014

O 29 de marzo celebramos un ano máis o encontro “Achegas da Psicoloxía”, dirixido a todos os colexiados e colexiadas do Colexio Oficial de Psicoloxía de Galicia. Neste acto fíxose entrega do Premio “Dolores Llópiz: Psicoloxía e Sociedade 2014”, galardón creado para distinguir á persoa, institución ou asociación que teña contribuído ao desenvolvemento da nosa profesión. A Xunta de Goberno do COPG acordou outorgar o premio nesta 6ª Edición á veciñanza de Angrois, que co seu comportamento xeneroso, exemplar e altruísta axudou a salvar vidas no tráxico accidente do tren Alvia acontecido en Santiago de Compostela a noite do 24 de xullo de 2013. O seu nobre xesto devolveunos a confianza na humanidade das persoas, reconfortándonos no medio dunha desgraza tan terrible que marcou a nosa sociedade de xeito irremediable.

Este ano entregouse a distinción de Colexiado de Honra do Colexio Oficial de Psicoloxía de Galicia, co que se pretende enxalzar a dedicación e significar as achegas ao desenvolvemento da nosa profesión. O galardón foi entregado ao colexiado Manuel Pazos Riveiro.

Como é tradición, tamén se efectuou un recoñecemento aos compañeiros e compañeiras que levan 25 anos de vida colexial de forma ininterrompida, e déuselle a benvida a todos os colexiados e colexiadas que se incorporaron, por primeira vez, ao Colexio Oficial de Psicoloxía de Galicia ao longo do ano 2013.

O encontro desenvolveuse no Hotel A Quinta da Auga (Santiago de Compostela), cun xantar que deu comezo ás 14.00 horas. 

Accede á galeria de fotos 

Achegas da Psicoloxía 2013

O 3 de maio de 2013 celebrouse no AC Hotel Vila de Allariz (Ourense) o encontro de todos os colexiados e colexiadas do COPG, acto no que se fixo entrega o Premio “Dolores Llópiz: Psicoloxía e Sociedade”. A Xunta de Goberno do Colexio Oficial de Psicoloxía de Galicia decidiu outorgar o premio nesta 5ª Edición a José Luis Sampedro Sáez, Escritor, Humanista e Economista, pola súa sensibilidade, o seu compromiso social, as súas reivindicacións de antes e de agora, a súa coherencia e actitude persoal, e polas súas palabras cun enorme poder de visualización e defensa da dignidade humana.

José Luis Sampedro Sáez faleceu na súa residencia en Madrid antes de poder acudir a recoller o galardón outorgado. Desde o Colexio fíxoselle entrega do galardón a súa viúva, Olga Lucas.

Déixanos un inmenso legado, literario, ensaístico e humanístico, as súas aportacións culturais e sociais perviven e son as que engrandecen a súa figura. Desde a nosa institución quixemos expresar o noso recoñecemento pola súa contribución aos valores humanos, tan cuestinados hoxe en día, como a igualdade, a educación ou a xustiza e ensalzar a súa actitude vital como exemplo para a sociedade.

Como en anos anteriores, no acto tamén se efectuou un recoñecemento aos compañeiros e compañeiras que levan 25 anos de vida colexial de forma initerrumpida, e tamén deuse a benvida a todos os colexiados e colexiados que se incorporaron, por primeira vez, ao Colexio Oficial de Psicoloxía de Galicia ao longo do ano 2012.

Galería de fotos [accede á páxina]

Achegas da Psicoloxía 2012

O 12 de maio tivo lugar no Parador de Baiona (Pontevedra), un encontro dos colexiados e colexiadas do Colexio Oficial de Psicoloxía de Galicia, acto no que se fixo entrega do IV Premio "Dolores Llópiz: Psicoloxía e Sociedade 2012", galardón creado para distinguir á persoa, institución ou asociación que teña colaborado co COPG contribuíndo ao desenvolvemento da nosa profesión. Este ano concedeuse o premio á Directora do programa La Ventana da Cadena Ser, Gema Nierga Barris, polos espazos "Nikosia" e "La tertulia desde la cárcel". Foi un recoñecemento desde a nosa profesión ao compromiso e a sensibilidade que desde La Ventana se leva demostrando durante anos cos colectivos que son motivo destes espazos radiofónicos. Unha enorme labor de visualización e desestigmatización "cedendo semanalmente os micrófonos a "locos" e a "presos", fai que os muros que os separa da sociedade acaben sendo derribados ou polo menos máis permeables.

Neste acto homenaxeáronse aos compañeiros e compañeiras da profesión que cumpriron 25 anos de colexiación e deuse a benvida a aqueles que se incorporaron por primeira vez ao Colexio Oficial de Psicoloxía de Galicia no ano 2011 facéndolles entrega dunha distinción colexial.

Galeria de fotos [accede á páxina]

Achegas da Psicoloxía 2011

O 7 de maio de 2011 celebrouse no restaurante da Casa DOMUS na cidade da Coruña o acto Achegas da Psicoloxía 2011, un encontro ao cal estaban invitados todos os colexiados e colexiadas do Colexio Oficial de Psicoloxía de Galicia, con motivo da III entrega do premio “Dolores Llópiz: Psicoloxía e Sociedade 2011”. Este galardón foi creado para distinguir á persoa, institución ou asociación que teña colaborado co COPG contribuíndo ao desenvolvemento da nosa profesión.

A Xunta de Goberno do Colexio Oficial de Psicoloxía de Galicia acordou facer entrega do premio “Dolores Llópiz: Psicoloxía e Sociedade”na súa edición de 2011 á Asociación pola Recuperación da Memoria Histórica. Fixo entrega do galardón Mª Rosa Álvarez Prada, Decana do COPG.

Neste evento tamén quixemos facer un recoñecemento aos compañeiros e compañeiras que cumpriron 25 anos de vida colexial de forma ininterrompida.

Galeria de fotos [accede á páxina]

Achegas da Psicoloxía 2010

O 6 de febreiro de 2010 tivo lugar en Santiago de Compostela o acto Achegas da Psicoloxía, un encontro de colexiados/as do Colexio Oficial de Psicoloxía de Galicia con motivo do acto de entrega do premio "Dolores LLópiz: Psicoloxía e Sociedade 2010". Este galardón, que terá carácter anual, foi creado pola Xunta de Goberno do Colexio coa fin de distinguir á persoa, institución ou asociación que teña colaborado co COPG contribuíndo ao desenvolvemento da profesión.

Neste evento  tamén tivemos ocasión de facer un recoñecemento aos/ás compañeiros/as que cumpriron 25 anos de vida colexial de forma ininterrompida.

Achegámonos a Compostela e celebrámolo no entorno incomparable que nos ofreceu o Hostal dos Reis Católicos, marco ideal non só para compartir un xantar, senón tamén para dar un percorrido a través da historia do COPG e perfilar novas expectativas no noso colectivo profesional.

A Xunta de Goberno do COPG acordoru a concesión do Premio Dolores Llópiz. Psicoloxía e Sociedade, na súa edición de 2010, a Don Carlos Varela García, Fiscal Xefe do Tribunal Superior de Xustiza de Galicia, por ter contribuíndo desde a súa profesión a avanzar cara unha sociedade máis xusta e igualitaria a través das iniciativas que promove. Con el confluímos os profesionais da Psicoloxía no enfoque da intervención en problemáticas de carácter social.

Fixo entrega a Decana do COPG, Mª Rosa Álvarez Prada.

Galeria de fotos [accede á páxina]

Achegas da Psicoloxía 2009

O 6 de febreiro de 2009 tivo lugar en Santiago de Compostela o acto Achegas da Psicoloxía, un encontro de colexiados/as do Colexio Oficial de Psicoloxía de Galicia con motivo do acto de entrega do premio "Dolores LLópiz: Psicoloxía e Sociedade 2009". Este galardón, que terá carácter anual, foi creado pola Xunta de Goberno do Colexio coa fin de distinguir á persoa, institución ou asociación que teña colaborado co COPG contribuíndo ao desenvolvemento da profesión.

Neste evento  tamén tivemos ocasión de facer un recoñecemento aos/ás compañeiros/as que cumpriron 25 anos de vida colexial de forma ininterrompida.

Achegámonos a Compostela e celebrámolo no entorno incomparable que nos ofreceu o Hotel Monumento San Francisco, marco ideal non só para compartir un xantar, senón tamén para dar un percorrido a través da historia do COPG e perfilar novas expectativas no noso colectivo profesional.

Dolores LLópiz Pereiro, foi unha compañeira que xa non está entre nós, e queremos recoñecer a súa implicación persoal e xenerosidade co Colexio, co que participou activamente durante máis de dez anos formando parte da Xunta de Goberno, da Comisión Deontolóxica e da Área de Psicoloxía Educativa. Lembrarémola cada ano distinguindo á persoa, institución ou asociación que teña colaborado co COPG contribuíndo ao desenvolvemento da nosa profesión.

A Xunta de Goberno do Colexio Oficial de Psicoloxía de Galicia quere facer público o recoñecemento da persoa á cal lle outorga este galardón na súa edición de 2009 por ter contribuído á sensibilización social coa divulgación da Psicoloxía nos medios de comunicación dende hai moitos anos. Sempre disposto a colaborar co Colexio coa súa entrega e dedicación desinteresada.

Por todo elo, concédese o premio Dolores Llópiz. Psicoloxía e Sociedade 2009 ao xornalista Joel Gómez.

Fixo entrega a Decana do COPG, Mª Rosa Álvarez Prada.

Galeria de fotos [accede á páxina]