Os psicólogos e psicólogas do Grupo de Intervención Psicolóxica en Catástrofes e Emerxencias (GIPCE) do Colexio Oficial de Psicoloxía de Galicia foron recoñecidos coa Medalla de Ouro de Galicia que concede a Xunta de Galicia, pola súa intervención no accidente do tren Alvia o 24 de xullo de 2013. Compartiu esta distinción coas vítimas e persoas afectadas, coa veciñanza de Angrois, así como cos demais equipos de profesionais e voluntarios que actuaron na emerxencia. A Medalla foi recollida pola coordinadora do GIPCE e do dispositivo de atención psicolóxica no accidente, Ana Isabel Martínez Arranz, e foi acompañada por varios membros do grupo durante o acto institucional do 24 de xullo.
A continuación, con motivo do aniversario desta intervención, o Colexio Oficial de Psicoloxía de Galicia organizou un acto na súa sede no que se proxectou o vídeo que produciu o COPG e que recolle as experiencias de varios membros do GIPCE que interviñeron no accidente e que se empregará tamén para a formación de futuros profesionais da psicoloxía de emerxencias.
Desde o Colexio Oficial de Psicoloxía de Galicia queremos manifestar unha vez máis que o noso sentir está sempre coas vítimas e coas persoas afectadas, e que confiamos en que consigan a verdade e a xustiza que reivindican.