AVISOS

O teu número de colexiación acredítate como profesional diante da sociedade: é o mellor aval para garantir que cumpres coa titulación e cos requisitos legais para exercercomo psicólogo ou psicóloga, sexa cal sexa a túa especialidade ou área de traballo. Faino público nos informes que elabores, no teu espazo de traballo, nas túas comunicacións ...

O Colexio Oficial de Psicoloxía de Galicia ten desde o pasado mes de setembro un novo enderezo de correo electrónico copgalicia@copgalicia.gal. Así integrámonos como dominio .gal, co fin de contribuír a crear unha entidade comunitaria tamén na rede. Lembra que realizamos a meirande parte das nosas comunicacións a través do correo electrónico, así que para garantir que non rematen na carpeta de SPAM, engade o noso enderezo aos teus contactos.

No conxunto do Estado español, é un requisito indispensable para o exercicio da profesión da psicoloxía estar incorporado ao Colexio Profesional correspondente. Todos os psicólogos e psicólogas que exerzan no ámbito público ou privado e baixo calquera fórmula de contratación, teñen esta obriga.

Este requisito recóllese no artigo 3.2  da Lei de Colexios Profesionais despois da reforma operada pola Lei 25/2009 (Lei Ómnibus), que mantén as obrigas vixentes.

Día Internacional das Persoas Maiores

1/10/2018

Con motivo do Día Internacional das Persoas Maiores que se conmemora este 1 de outubro, a Sección de Psicoloxía da Intervención Social do Colexio Oficial de Psicoloxía de Galicia, a través do Grupo de Psicoloxía do Envellecemento, organizou unha actividade informativa a pé de rúa.

O sábado 29 de setembro, os membros do Grupo, Arturo X. Pereiro (profesor da Facultade de Psicoloxía da Universidade de Santiago de Compostela) e Pedro Santamaría (psicoxerontólogo) estiveron informando nun posto propio na Praza de Abastos de Santiago de Compostela sobre todo o que pode facer a psicoloxía polas persoas maiores, ademais de ofrecer un cribado do estado cognitivo a aquelas que estivesen preocupadas pola súa memoria. O balance da actividade foi moi positivo, xa que foron moitos os homes e mulleres que se achegaron para obter información sobre esta cuestión.