O Colexio Oficial de Psicoloxía de Galicia, a través do Grupo de Intervención Psicolóxica en Catástrofes e Emerxencias (GIPCE), mostrou a súa dispoñibilidade desde os primeiros momentos á Consellería de Presidencia, Xustiza e Deportes, á Axencia Galega de Emerxencias (AXEGA), ao Consejo General de la Psicología de España e ao Col-legi Oficia de la Psicología de la Comunitat Valenciana para que as axudas se leven a cabo dunha forma organizada e coordinada. Ata o momento, o GIPCE está contemplado dentro de varios dispositivos de axuda e con integrantes listos para desprazarse á zona afectada en canto sexan requeridos.
En situacións de catástrofe como a que están vivindo nestas zonas a atención psicolóxica ás persoas afectadas convértese nun servizo esencial para axudarlles a restaurar as súas capacidades e recursos de afrontamento e para minimizar o impacto psicolóxico e previr posibles problemas de saúde mental posteriores. Asemade, é moi importante a atención aos diferentes grupos de profesionais de emerxencias mobilizados na zona, permitíndolles descargar a tensión emocional e o estrés derivado da situación de dor e sufrimento da comunidade coa que están en contacto.
Como Colexio Profesional sentímonos orgullosos da resposta que estamos a recibir dos nosos colexiados e colexiadas ofrecendo a súa dispoñibilidade e experiencia para desprazarse á zona devastada e atender ás persoas afectadas. Queremos agradecer todas as iniciativas que nos estades facendo chegar. Moitas grazas! A vosa solidariedade e humanidade nestes momentos é admirable!
Neste momento a atención psicolóxica na zona está sendo levada a cabo por profesionais da psicoloxía da UME, dos servizos municipais das Comunidades Autónomas afectadas, polos Grupos de Intervención Psicolóxica en Catástrofes e Emerxencias (GIPCE) dos Colexios Oficiais de Psicoloxía das respectivas Comunidades Autónomas e profesionais de Psicoloxía Sen Fronteiras. Ademais, dende a Área de Intervención Psicolóxica en Emerxencias e Catástrofes do Consejo General de la Psicología de España estase coordinando coas autoridades das zonas afectadas para organizar e desprazar os dispositivos de atención psicolóxica especializada en emerxencias e catástrofes que sexan necesarios.
